الاثنين، 31 أكتوبر 2011

الفلول مقامات وتاريخ عائلات

كلمة لم نسمعها قبل ثورة 25 يناير ولم نسمعها ابدا طوال فترة ال 18 يوم أي من يوم25 حتي يوم 11فبراير ، ولكن بعد أن هدأت
الامور وترك الثوار الميدان وعادوا الي منازلهم معتقدين ان الثورة قد نجحت وأوكلوا مسؤلية الثورة وأدارتها الي المجلس العسكري بدأت صحوة الثورة المضادة وبدأ فلول الحزب الوطني في استعادة توازنهم بعد زوال حالة الدوار التي أصابتهم ومن هنا كانت حالة عدم الاستقرار
التي مازلنا نعيشها حتي الان لذا كانت هذه الكلمات عن الفلول :-
الفلول أصول وكمان مقامات
الفلول فروع وتاريخ عائلات
فيه فل أصله أبن ذوات
وفل نشأ وأتربي علي الفضلات
وفلة في المدبح بتبيع ممبار وحاجات
وفل بيتاجر في عملة ويبيع دولارات
وفل متصيت في الجامعة وبتاع شهادات
في السياسة متخصص وخبير أزمات
وفل النسوان غيته وسميحة بالذات
وفل القمار لعبته والتلات ورقات
وفل العلاج صنعته وبيجيب قرارات
لمريض أندفن وأربيعنه فات
وفل القروض بيكتب لها طلبات
يقبضها كاش ويسدها لو مات
وفل في البحار قبطان وفي المحيطات
عنده مراكب سفن وكمان عبارات
حط الخلايق علي مركبه وعدي وفات
وغرق اللي غرق ومات اللي مات
وهرب علي لندرة والنصرة للبهوات
وفل ليه خبرته في الانتخابات
وتستيف الورق وحسبة الاصوات
وفل يعبد سيده ويقول كلمات
بالرصاص أضربوا بتوع المظاهرات
وفله كُبارة وبتبوس الايادي
وزيرة في وزارة وبتشغل أيادي
وبناتنا بشهادة خدامة لهنادي
وفل بن فلة لكنه لئيم
سرطن حياتنا وعاش في نعيم
بمبيد سم هاري عشنا في جحيم
وهو الآكادة عايش سليم
وفل غاوي يبيع ولو أبوه
باع المصانع وحتي المزارع ياهوه
باع الاراضي بتراب الفلوس أشنقوه
فل وخمورجي أكيد عرفتوه
وفل التوريث كان شاغله وشاغلنا
ياما غني لجل ما يسعد سيده ويقرفنا
وقال يا مأكلنا ومالي بطونا
مين غيرك ينفع يحكمنا
يا ملبسنا وكاسي عيالنا
ب تشيرتات عل قد مقاسنا
وقع وفع ده جمال ريسنا
يا مهيصنا ويا مدلعنا
طعم اللحمة علي أيدك دقنا
وقع وقع ده جمال ريسنا
وأدي حكاية الفلول قلناها
فل وفلة ومن قلب التاريخ صغناها
فلولك يا مصر سرفوكي والهدمة باعوها
فلولك يا مصر باعوكي والبومة خلوها
فلولك يا مصر ماتوا لما حزبهم حلوه
والميت عمره ما يرجع ولو أسمه غيروه

الجمعة، 9 يوليو 2010

البورصة ... (من أوراقي القديمة 2 )

الشركة التي كنت أعمل بها كانت قد رشحتني لحضور دورة عن سوق المال والبورصة والتعاملات المالية في الاسهم وكانت دراسة مركزة وتحتوى علي الكثير من المعلومات الهامة والمتخصصة وأثناء هذه الدورة وتأثرا بها كانت هذه الكلمات :-

ياللي عايز تخش البورصة وتضارب
وتعللي في سعر السهم يعلي وتحارب
ترمي الاشاعة تولع حريقة وتتجاوب
أسمع كلامي لجل تبقي كده فالح
سيبك من شغل الفهلوة لجل تكون ناجح
يلزمك دراسة لسوق المال وقانونه
وتلم بقواعد القيد والافصاح دي علومه
وتبقي ياسيدي فاهم أيه هي الحوكمة
وعن الاستحواذ تكون أنت بريمو المكلمة

الأحد، 16 مايو 2010

رئيس التحرير (من أوراقي القديمة )


في عام 2003 تم توقف بث برنامج رئيس التحرير للاعلامي البارز ألاستاذ/ حمدي قنديل
وكنت من عشاق هذا البرنامج وأتابعه بأستمرار لذا شعرت بحزن شديد لتوقفه ولآحساس
بدرجة الصدق العالية لمقدم البرنامج ومن ثمَ كانت هذه الكلمات :-



يارئيس التحرير ياجريء ياشُجاع ولا فيش زيك زيّ
زعلت منك أمريكا والبنت كونداليزا ولا يهمك ياخيّ
بيقولوا عنك غلباوي غاوي رط وحكاوي ومددك حتما جيّ
لسانك زي الفرقلة يحكي دايماً ع العلة والمبطوح حتماً بيقول أي
بتقول أللي في بالي ولسانك تسبق بيه لساني وكأنك بتحكي عن حالي
مواجعي دايما تحكيها والسادة تناقشهم فيها والباطل ما يخشي إلا الضيّ
في سياسة بتحاور والاقتصاد فيه بتناور أستاذنا من السوربون جيّ
بيقولوا حرية للإعلام مية المية واللي شايفه عيّ
فين هي الشفافية والمصارحة يابلدية ده أسباب الغيبة هيّ
ياتري فين قنديل طيب ولا عليل ده دمي بيغلي غليّ
يارئيس التحرير نفسي أسمع صوتك تاني وتدندن ألحانك في وداني
صوتك جوه في وجداني وصورتك عايشة في خيالي وبأدعيلك ليلي ونهاري
قنديل ربي يخليك ويبارك لللأمة فيك وصوتك يرجع ويلالي
وبأقول للأخوة ويا ألاخوات عرب أوحتي خواجات قنديل راجع من تاني
في صوتي وصوتك وبأسمي وأسمك لآنه مصري مش مصريكاني




الثلاثاء، 11 مايو 2010

أللحمة


في هذه الايام وبعد أن أرتفعت أسعار اللحوم الي مبالغ خيالية وصلت حتي 80 جنيه للكيلو وأصبح تناول اللحمة لبعض الناس مع تدني
الاجور ضرب من الخيال ومن رابع المستحيلات وعلية فبعض الناس من المحظوظين يأكل اللحوم كل يوم والبعض ألآخر يكتفي
فقط بنعمة النظر اليها عند الجزار ..... ومن هنا كانت هذه الكلمات :-
أللحمة ما فيش بيني وبينها عمار
لا أكلها مسلوقة ولا مشوية ع النار
ولما تلمحها عيني متعلقة عند الجزار
والسعر عليها يعني حريقة ووالع نار
يصعب عليُ أهلي وحتي سابع جار
وأقول ياناس حرام وبلاش أنتحار
لو نفكر يوم شوية ح نقلل المقدار
اللحوم لما تاكلها تصيبك ألآضرار
ولو عايز ح أقولك وأزيدك م الحوار
اللحمة غالية خالص وبتبوظ ألادخار
وبتقضي ع الماهية وتصيبك بالدوار
بلاش ياسيدي منها وخليك ف الخضار


الأربعاء، 21 أبريل 2010

نشأت القصاص ضد الشعب

أول أمس وفي برنامج العاشرة مساء أستضافت الاعلامية القديرة مني الشاذلي الاستاذة جميلة أسماعيل والنائب / نشأت القصاص الذى
طالب وأخرين قوات ألامن بأطلاق الرصاص علي المتظاهرين . ولا أعلم كيف يكون هذا نائبا عن الشعب ويطالب بقتل شباب الامة
بالرصاص لمجرد قيامهم بتظاهرة سلمية للتعبير فيها عن أراؤهم نحو قانون الطوارىء وتعديل الدستور .
أبدعت الرائعة / جميلة أسماعيل وكانت لبقة جدا في حديثها ومقنعة بعكس النائب المحترم .
http://www.youtube.com/watch?v=7JBgsCqNP80&feature=related
ومن ثم كانت هذه الكلمات :-
نشأت نشأت ياقصاص
عايز تضربنا بالرصاص
وحقنا عندك القصاص
ومحدش عايزك خلاص
روح بيتك ياقصاص
باين أنك هجاص
لو بتمثلنا بأخلاص
تحمينا من ضرب الرصاص
شفتوا جميلة عملت أيه
كلامها لخبط حاله أصمله علية
شاطرة وواعية بنت الايه
بشياكة وذوق ولطافة جابت رجليه
وضربته بالقاضية أخص عليه

الاثنين، 29 مارس 2010

البرادعي في الحسين

في يوم الجمعة 19 فبراير 2010 وصل الكتور محمد البرادعي الي مطار القاهرة حوالي الساعة الخامسة مساء وكان في أستقباله الكثيرين
ممن يشتاقوا ألي التغيير... ولآن الحياة لا تستقيم علي وتيرة واحدة ..... ولآن التغيير هو سنة الحياة كان لقاء البرادعي مع النخبة من
المثقفين وأصحاب الفكر ممن لا يجيدون الطبل والزمر وكانت ( الجمعية الوطنية للتغيير ) هي ثمرة هذا اللقاء .
وبالآمس القريب ذهب البرادعي الي مسجد الحسين وأدى صلاة الجمعة مع الجماهير المتواجدةفي المسجد .... وتجول سيرا علي الاقدام
في المنطقة المحيطة بمسجد الحسين .
مع البرادعي نشعر بالآمل ... ألآمل في غد أفضل بلا نفاق ولا فساد ولا توريث ومن ألآمل وبألآمل كانت هذه الكلمات :-
يابرادعي أهلا بيك
مصر بلدنا بتحييك
شفت ولادك أزاى قابلوك
وهتفوا بأسمك لما شافوك
ووقفوا ساعات لجل يحيوك
وقالوا أملنا كبير وياك
والتغيير حيبقي حقيقي بيك ومعاك
شفنا الصدق في نظرة عينك
وسمعنا الحق في نبرة صوتك
سمعت أنت أيه قالوا عليك
قالوا ده سويدى الجنسية
وكمان خايب في الكلية
والحق أن صحابنا عواطلية
قلقوا لما أعلنت النية
أسمعها مني كلمة فصيحة
حأقولها من قلبي وصريحة
ناس بلدنا عايزة معدية
وريس يوصلهم شط الحرية
ويقضي علي الفساد والحرامية
وأنت أللي عليك العين والنية
سير ع البركة وأحنا وراك
ودستورنا ح نعدله وياك

الأحد، 25 أكتوبر 2009

أمي التي أنجبتني

حرمت نفسها وأعطتني ضحكت فأسعدتني وعندما عبست أتعستني ... أمي عانت في حياتها كباقي الامهات
ثم كان المرض وضعف الابصار ثم فقدت نظرها تماما ( لعن الله ضمور العصب البصري ) وظلت دائما
تقول : الحمد لله .
أدعو الله العلي القدير أن يُديم عليها الصحة والعافية وأن يرزقها الصبر وأليها هذه الكلمات :-
أمي ضحكة
في دنيا وحشة
أمي بسمة
في ضلمة حالكة
أمي نسمة
في ليلة زمتة
أمي طيبة
والنفوس خبيثة

********

أمي صحوة
لظلام وعتمة
امي صابرة
والعيشة صعبة
امي شافت
ولقدرها عاشت
راضية وماجابت
للرفض سيرة

********

أمي شاخت
وعينها راحت
وسنانها مالت
وصحتها ضاعت
نامت وقالت
أعفيني وعافيني
وللجنة وديني

*********

أمي راضية
والدنيا فانية
وللرب داعية
يارب تحميها
وتنور لياليها
والصحة تهديها
والسعد تديها
وبالتقوى تغنيها
وف الجنة خليها
جارة لخديجة
زوجة نبينا